Gazagystan Türkmenistandan tebigy gazyň import edilmeginiň mümkinçilikleri barada maslahatlaşýar. Bu barada LS habarlar agentligi belleýär.

Gazagystanyň “QazaqGaz” milli gaz kompaniýasyna laýyklykda, geçirmeleriň möçberi söwda we tehniki şertleri hasaba almak bilen iki ýurt tarapyndan kesgitleniler.

Şeýle hem, “Türkmengaz” Döwlet konserni bilen hyzmatdaşlygyň çäklerinde birnäçe başlangyçlar öwrenilýär. Hususan-da, bilelikdäki geologiýa gözleglerini amala aşyrmak üçin iki ýurduň hem geljegi uly bolan ýerleri barada maslahatlaşmalar göz öňünde tutulýar. Bu ugurda öňde duran işleri durmuşa geçirmek üçin degişli maýa goýum ylalaşyklarynyň gol çekilmegi zerurdyr.

Häzirki wagtda Gazagystanyň içerki bazary ýerli çig-mal bilen üpjün edilýär. Serişde diňe ýokary sarp ediş döwürde import edilýär.

Ozal “QazaqGaz” kompaniýasynyň başlygy Sanžar Žarkeşow öňdäki 10-15 ýylyň dowamynda Gazagystanda gaz ulanylyşy iki esse artmagynyň mümkindigini belledi.