4-nji awgustda Pakistan Yslam Respublikasynyň Türkmenistandaky Adatdan daşary we Doly ilçisi Ahsan Wagan Pakistana gidýän türkmen işewür wekiliýetiniň hormatyna kabul edişlik gurady. Bu barada «News Central Asia» web saýtynda habar berilýär.

Wekiliýet «Food AG 2024» sergisine gatnaşar. «Food AG 2024» Söwdanyň ösüşi boýunça halkara guramasy (TDAP) tarapyndan Karaçi sergi merkezinde (2024-nji ýylyň 9-11-nji awgusty) guralýan halkara azyk we oba hojalygy önümleriniň ikinji sergisidir.

«Food AG 2024» «Durnukly geljegi döretmek» temasy bilen umumy geljege umyt döretmek üçin halkara hem ýerli jemgyýetleri birleşdirer.

Ilçi Wagan gysga çykyşynda Pakistanyň we Türkmenistanyň azyk hem oba hojalygynyň özara sazlaşyklydygyny aýtdy. Serginiň dowamynda ol türkmen telekeçileriniň giň hyzmatdaşlyk mümkinçiliklerini tapjakdygyna umyt bildirdi.