2024-nji ýylyň 19-20-nji sentýabrynda ýurdumyzyň Garaşsyzlygynyň 33 ýyllygy mynasybetli Aşgabatda geçiriljek Türkmenistanyň maýa goýum forumyna bellige almak açyldy.

Türkmenistanyň Maliýe we ykdysadyýet hem-de Daşary işler ministrlikleri bu forumyň guramaçylary hökmünde çykyş edýärler.

«TIF 2024» Türkmenistanyň ykdysadyýetine maýa goýumlaryny çekmek, täze maýa goýum taslamalaryny durmuşa geçirmek we halkara hyzmatdaşlygyny pugtalandyrmak boýunça möhüm meseleleri ara alyp maslahatlaşmak üçin diýseň ähmiýetli halkara çäresine öwrüler. Foruma ýokary derejeli ýolbaşçylar, bilermenler we nebit-gaz, energetika, gurluşyk, ulag hem aragatnaşyk pudaklarynda işleýän öňdebaryjy milli we halkara kompaniýalaryň wekilleri gatnaşar. Şeýle hem «TIF 2024-e» dünýäniň iň uly maliýe guramalary, banklar, halkara guramalary hem-de gözleg merkezleri wekilçilik ederler.

Türkmenistanyň ägirt uly mümkinçilikleri döwlet eýeçiligindäki kompaniýalaryň Türkmenistanyň ykdysadyýetiniň dürli pudaklaryna göni daşary ýurt maýa goýumlaryny çekmek üçin ähmiýetli boljak forumyň üns merkezinde bolar.

Forumda sanly tehnologiýanyň durnukly ösüşdäki orny, daşky gurşawyň durnuklylygy, ykdysady baglanyşyk üçin infrastrukturany gowulandyrmak, oba hojalygyny we senagat pudaklaryny diwersifikasiýa etmek hem-de döwlet-hususy hyzmatdaşlygy ýaly möhüm meseleler ara alnyp maslahatlaşylar. Aýry-aýry sessiýalar «ýaşyl» ykdysadyýete we ulag aragatnaşygyny kämilleşdirmäge bagyşlanar. Şeýle hem Türkmenistanyň ykdysady üstünliklerini görkezýän sergi ýaýbaňlandyrylar.

Guramaçylyk komiteti Türkmenistanyň nebit-gaz, bank, maliýe, himiýa, ulag we energetika pudaklarynyň ýolbaşçylary bilen maýa goýum mümkinçiliklerini ara alyp maslahatlaşmak üçin duşuşyklary geçirer.