Türkmenistanyň Maliýe we ykdysadyýet ministrliginiň Intellektual eýeçilik boýunça döwlet gullugy «Alunityň, tozganyň (Taraxacum officinale) we rozmariniň (Rosmarinus officinalis) fitomineral bejeriş geli» atly işläp taýýarlamak tehnologiýasyna awtorlyk hukugyny bellige aldy. Bu barada «Altyn asyr» elektron gazetindeň habar berildi.

— Toplumlaýyn bejeriş geli bu diňe bir döwrebap serişde däl-de, eýsem, tebigy lukmançylygyň dogry we ylmy çemeleşme bilen netijelidiginiň nyşanydyr. Alunit esasyny üpjün edýär, tozga ýumşaklygy, rozmarin bolsa energiýa berýär. Bilelikde olar deriniň janly agza bolup, dogry şertlerde özüni dikeltmäge ukyplydygyny ýatladýan sazlaşyklygy döredýärler — diýip, biotehnologiýalar barlaghanasynyň müdiri Altyn Rahmanowa belleýär.

Ylmy gözlegiň awtorlary Türkmenistanyň Ylymlar akademiýasynyň Halkara ylmy-tehnologiýa parkynyň biotehnologiýalar barlaghanasynyň hünärmenleri A.Rahmanowa we D.Gadamowdyr.

Alunit – mikroblara garşy we agzy gamaşdyryjy häsiýetleri güýçli bolan mineraldyr. Ol deriniň gyzaran ýerlerini ýuwaşlyk bilen ýygryp, suw balansyny sazlaýar, mikroblaryň we hapalaryň ýaýramagyny çäklendirýär. Alunit geliň düzüminde alamatlary ýaşyrmak däl-de, deriniň ýerli dikeldiş derejesinde täsir edip, mineral durnuklaşdyryjy wezipesini ýerine ýetirýär.

Tozga fitohimiki birleşmelere baý ösümlik bolup, halk lukmançylygynda gadymdan bäri ulanylýar. Ol gyzarmany azaldýar, gyjyndyrmany ýumşadýar we dokumalaryň tebigy täzelenişini höweslendirýär.

Rozmarin güýçli tebigy höweslendiriji we antioksidantdyr. Onuň ekstrakty we efir bölekleri tonus beriji, mikroblara garşy we umumy berkidiji täsir edýär. Rozmariniň ysy aňyň aýdyňlygy we bedeniň güýç-kuwwaty bilen baglanyşyklydyr.