Türkmenistan bilen Ispaniýa Ýewropa Bileleşiginiň çäklerinde ikitaraplaýyn hyzmatdaşlygyň dört esasy ugruny — ulag we logistika, energetika, strategik çig mal serişdeleri hem-de howa gün tertibini ileri tutulýan ugurlar hökmünde kesgitlediler. Bu barada Türkmenistanyň Brýusseldäki ilçihanasy ilçi Sapar Pälwanowyň Ispaniýa Patyşalygynyň ÝB-niň ýanyndaky Hemişelik wekili Markos Alonso Alonso bilen geçiren duşuşygynyň jemleri boýunça habar berdi.

Taraplar bu ugurlary ÝB-niň strategik bähbitlerine hem-de Türkmenistanyň ykdysadyýeti diwersifikasiýalaşdyrmak syýasatyna deň derejede laýyk gelýän bilelikdäki tagallalaryň esasy ugurlary hökmünde ylalaşdylar.

Gepleşikleriň dowamynda taraplar geçen ýyl kabul edilen ÝB bilen Merkezi Aziýanyň arasyndaky strategik hyzmatdaşlyk Konsepsiýasyny durmuşa geçirmegiň mehanizmlerini hem ara alyp maslahatlaşdylar. Brýussel bilen Aşgabadyň arasyndaky hukuk we şertnama binýadyny kämilleşdirmek meselesine aýratyn üns berildi. Bu ugur gazanylan ylalaşyklary anyk taslamalara öwürmegiň möhüm guraly hökmünde görkezildi.

Pälwanow Brýusselde ÝB-niň agza döwletleriniň ilçileri bilen Merkezi Aziýa ýurtlarynyň diplomatik wekilleriniň arasynda yzygiderli gepleşik meýdançasyny döretmek başlangyjy bilen çykyş etdi. Ispan tarapy bu teklibi goldady.

Habarda bellenilişi ýaly, Türkmenistan Merkezi Aziýa boýunça Ýewropa syýasatynyň işjeň gatnaşyjysy hökmünde Ispaniýa bilen hyzmatdaşlyga hemişe uly ähmiýet berýär — diýlip, habarda nygtalýar.